الأربعاء، 9 مارس 2011

لا أناااام.....


لا أناااااام...............
يابااااااااى هو أنا هانام امتى بقى ...... دماغى شغالة 24 ساعة ، 7 أيام في الأسبوع.....هي ليه القرارات دى صعبة أوى كده ؟؟ طب هم كل البنات والولاد بيفكروا زيي كده كتير؟ همممم مش عارفة...يعنى أوافق بقى ع العريس ده و خلاص؟؟واتكل على الله بقى مادام عملت استخارة يبقى كده كله تمااااام  التمام؟؟ولا أرفض وأدور تانى وتالت ورابع لحد مالاقى نصى التانى بجد؟؟ انا حاسة إن أمى هاتدلقنى من البلكونة أو ان الحاج هايعلقنى في النجفة و يخلص بقى ...........
المشكلة أنهم محسسنى انى بلغت من العمر أرذله إكمنى جبت الـ 25 سنة ... نفسي يتفائلوا ده انا لسه ورور أمال لو شافوا احصائيات تأخر سن الزواج محسسنى انى بقيت تقيله عليهم تقل رهييييييييييب ، كل شوية الحاجه تنبط وتقولى : البت سوسو بنت خالتك نازله النهاردة تجيب عفشها من دمياط ، مش عارفه هي بتغيظنى بسوسو ولا بدمياط ؟؟ فلانة اتخطبت علانه اتجوزت ترتانه اتطلقت ويكفى انها نالت شرف الجوااز !! طب وأنا مالى اعمل ايه يعنى أقبض على عريس في الشارع..؟؟
عريس يااامااااااااااااااااي !!!!!!!!
الفكرة انها شايفة انى بكبر كل يوم عن التانى وان سوقى بيقف ، نفسي تفتكر انها قسمة ونصيب وان القصة مش سلق بيض ! ده مشروع العمر يا ناااس ...
وبما انى قررت انى ابدأها صح خاصة بعد الثورة اكمن الواحد بقاله نفس يعيش يبقى لازم نختار صح...

بدايةً هما مجموعة حاجات مع بعض مانقدرش نقول هو ايه اهم من التانى كلها عوامل موازية لبعض بجد ولها نفس التقل.

انا مش هاقلوكوا انى لازم أحب في قصة حب لأنى مش مقتنعة بالتسبيل والنظرات وغرام في الكرنك بقى واديلوا ..لان الحاجات دى مش كافية ابدا انها تفتح بيت ومسئولية ،ده  شئ بعيد تماما عن أرض الواقع وصدقونى احصائيات كتير بتقول ان الزيجات اللى بتبتدى بالحب  والهيام بس مش كلها بتكمل يا اما بتكمل وهى فاشلة ولها ضحايا وهم الأطفال، المهم أهم حاجه وأول حاجة بتبقى القبول وانتى قاعدة كده الولد ده اتبلع ولا لأ؟ وكذلك بالنسبة للولد ، ومافيهاش حاجة انى اكون ماأعرفهوش قبل كدة والله يابنات معظم الزيجات دى ناجحه ان لم تكن هي المكتسحة في النجاح ، ياستى هانعرفه وهناخد وقتنا بالكامل اننا نعرفه وماحدش قالنا نتجوزه بكره، امال هما عملوا فترة الخطوبة وقراية الفاتحة ليه؟ ماهى للدراسة والتعارف ، كده لوز أوى..، حاجة تانية بتتعمل في نفس الوقت لازم نعرف أخلاق الناس دى يبقى بنكون اكييد سأليين عليهم كويس اوى اوى في كل حته  في مكان سكنهم وشغلهم والنادى وكله كله عشان ناخد ولو انطباع مبدأى نعرف منه هانخش التجربة ولا ايه؟ بس بردو كمان انتى في فترة التعارف اكيد هاتدرسيه عن طريق شوية اختبارات وتجارب ومواقف واحتكاك على شوية خباثة وكهن بنات .
سألنا ع الناس وارتحنا بس بردو حاجه قوية جدا بتتحط في الاعتبار وهى مدى التكافؤ مابينكوا... يعنى ازاى؟ شوفوا التكافؤ الاجتماعى مثلا اللى هو طباعكوا تقاليدكوا اللى طبعا مختلفة من بيت لبيت زي الست هاتشتغل ولا لأ ؟ مثلا مسموح تخرجى مع صحابك ولا ايه النظام؟ وكمان اسلوب حياتكوا ، مانتى ممكن تكونى بتاكلى بالشوكة والسكينة وهو بياكل بصوت مثلا وبإيده ومليطة بقى يا اختى او اولادك مثلا اما يروحوا عند أهله وعند أهلك ، هل في فروق جوهريه؟ وهل عند أهله عادات سيئة مش عايزة اولادك يكتسبوها؟ ، ها.... هاتستحملى ولا الحاجات الصغيره دى اللى في زيها كبير ولا لأ؟ لازم تتكلموا وتشوفوا ان كنتوا هاتتوصلوا لحلول وسط في حالة الاختلاف ولا لأ ؟ في كمان التكافؤ الثقافى والتعليمى ، يعنى مايبقاش الحليوة دبلووون وسيادتك بتحضرى ماجستير ياقطة ، ده  كده فرق السما من العما ، ماتخليش الناس تغريكى ان عنده الفلوس اكِواام اكِوااام ،لأن هو هايطلع عينك وهايفتكرك على طول متنططه علية ، وعلى ايه يا بنت الناس ؟ يعنى تقوليله ميدان التحرير يقولك هاتيلى شقة بطيخ ، ماينفعش تاخدى حد من العصر البائد بيفكر على تردد غير ترددك ، بس بردو عشان العدل في ناس شهاداتها مش عالية لكن عندهم قدر من الثقافة مش ممكن ، اهو ده ممكن يوزن ده ساعتها ممكن تفكرى بقى اذا كان عندك بوادر قبول ، في كمان قصة فرق السن الكبير اللى بتعدى 10 سنين، لأ تعرفى انه لو كبير هايجى وقت انتى بتتنططى وهو قاعد في البيت وهايبقى في فجوة اجيال بينه وبينك وبينه وبين اولادكم وحاجات ياما الواحد بيقيس عليها.
يمكن طولنا شوية في قصة التكافؤ.. بس دي نبذة صغيره صدقونى ، الموضوع بجد كبير ، نشوف كده طلعنا بايه؟ قبول تكافؤ وأخلاق ،دول بأمانة أول 3 حاجات كده واحنا لسه قاعدين ع الطرابيزة ،ومع العشرة وكثرة الحوارات والاختبارات باقى الفكرة هاتكمل عندك ، وعايزة اقول حاجة القبول والعشرة الطيبه بتجيب الحب والدفا اللى كل البنات والولاد بيدوروا عنه، وهى دى خلاصة القول زى مابيقولوا كده ع الاقل النهاردة عشان ترتبى أفكار مبدئية عن كيفية اختيار شريك الحياة ، واستنونا بقى لأن فيه كلام لسه كتيييييييييييييييييييير ...........

هناك تعليق واحد:

  1. ماينفعش تاخدى حد من العصر البائد بيفكر على تردد غير ترددك ..عجبتنى قوى و فى وقتها :)

    مستنياكم بسرعة و متشوقة اعرف اكثر

    ردحذف